افغانستان خواهان همکاری با تاجیکستان شد

خبرگزاری مهر: عبدالله عبدالله رئیس اجرایی دولت وحدت ملی افغانستان از دولت تاجیکستان خواست تا با افغانستان در مبارزه با تروریسم همکاری کند. عبدالله عبدالله با «شرف‌الدین امام‌ اف» سفیر تاجیکستان در افغانستان دیدار کرد. در این دیدار هر دو طرف در باره مسائل دو جانبه در بخش های مختلف به‌ ویژه تقویت روابط اقتصادی، مبارزه با تروریسم و افراط گرایی بحث و تبادل نظر کردند. عبدالله با ابراز خرسندی از روابط دوستانه میان افغانستان و تاجیکستان گفت: دولت وحدت ملی بر اساس حسن‌ همجواری، احترام مقابل، روابط نیک و سازنده با کشورهای همسایه و منطقه همکاری می‌کند و در این زمینه تاجیکستان یکی از همسایگان خوب افغانستان است. عبدالله با اشاره به شرایط حساس منطقه‌ای اظهار داشت: تروریسم و افراط‌ گرایی یک تهدید بزرگ برای تمام کشورهای منطقه به‌ ویژه کشورهای آسیای میانه است که افغانستان خود در خط مقدم مبارزه علیه تروریسم است. رئیس اجرایی دولت وحدت ملی افغانستان تاکید کرد: دولت کابل امیدوار است که تمام کشورها از جمله تاجیکستان برای مقابله با تروریسم با حکومت وحدت ملی همکاری جدی‌تر و بیشتری داشته باشند. همچنین شرف‌الدین امام‌ اف ابراز کرد: کشورش آماده همکاری بیشتر برای تقویت روابط اقتصادی، تجاری و ترانزیتی با دولت وحدت ملی است تا از فرصت‌های موجود برای رشد اقتصادی و سرمایه‌گذاری در هر دو کشور استفاده بهینه صورت گیرد. سفیر تاجیکستان در ادامه افزود: تروریسم و افراط گرایی یک تهدید کلان در منطقه است و ما برای مبارزه با آن در کنار افغانستان هستیم.